ပြောင်းလဲပြင်ဆင်လိုက်သည့် ဝတ်စားဆင်ယင်မှုဖြင့် ပြည်တွင်း ကာယအလှမယ်ပြိုင်ပွဲများကို ၂၀၁၂ ခုနှစ် ဇွန်လအတွင်း ပြုလုပ်မည့် အိုလံပစ်နေ့အထိမ်းအမှတ် အားကစားပြိုင်ပွဲများတွင် စတင် ကျင်းပနိုင်ရန်စီစဉ်ထားကြောင်း မြန်မာနိုင်ငံ ကာယဗလနှင့် ကာယအလှအဖွဲ့ချုပ် အမှုဆောင် ဒေါ်ရီရီဝင်းကပြောသည်။
ပြည်တွင်းပြိုင်ပွဲများတွင် နှစ် ၃၀ ကျော်ကြာ မြန်မာဝတ်စုံ အင်္ကျီလက်ပြတ်၊ အထက်အောက် အရောင်ဆင်တူ ဝတ်စားဆင်ယင်မှုများအား ဘောင်းဘီအတို၊ အင်္ကျီလက်ပြတ် ဝတ်ဆင်ယှဉ်ပြိုင်မှုအဖြစ် ပြောင်းလဲရခြင်းမှာ မြန်မာအမျိုးသမီးများ နိုင်ငံတကာပြိုင်ပွဲများသို့ ထိုးဖောက်ယှဉ်ပြိုင်နိုင်ရန် ရည်ရွယ်ကြောင်း ၎င်းကပြောသည်။
(ကာယအလှမယ်ပြိုင်ပွဲများတွင် ခွင့်ပြုလိုက်သည့် ဝတ်စုံသစ်) (ဓာတ်ပုံ - 7Day News Journal)
“ပြည်တွင်းမှာ ကာယအလှမယ်တစ်ဦးဟာ မယ်မြန်မာဖြစ်ပြီးရင် သူ့အတွက်က ပြီးသွားပြီ။ ဘာမှဆက်လုပ်စရာ မရှိတော့ဘူး။ အိမ်နီးချင်းနိုင်ငံတွေမှာလည်း နိုင်ငံတကာပြိုင်ပွဲ သတ်မှတ်ချက်တွေနဲ့ ယှဉ်ပြိုင်နေကြပြီဖြစ်တဲ့အတွက် ရိုးရာယဉ်ကျေးမှုတွေလည်း မပျောက်စေဘဲ ပြင်ဆင်စီစဉ်ရခြင်း ဖြစ်ပါတယ်။ ဒါပေမဲ့ နိုင်ငံတကာမှာ ဘီကီနီနဲ့ပြိုင်တာဖြစ်ပေမယ့် မြန်မာနိုင်ငံမှာတော့ ဘီကီနီမဝတ်ဘူး။ နိုင်ငံက လက်ခံနိုင်တဲ့ပုံစံနဲ့ လုပ်သွားမှာပါ”ဟု ဒေါ်ရီရီဝင်းကပြောသည်။
(ပြောင်းလဲခွင့်ပြုလိုက်သည့် ဝတ်စုံသစ်ဖြင့် မြင်တွေ့ရသည့် ကာယအလှမယ်တစ်ဦး)(ဓာတ်ပုံ - 7Day News Journal)
ထိုသို့ ပြောင်းလဲလိုက်သည့် ဝတ်စားဆင်ယင်မှုသရုပ်ပြပွဲကို ၂၀၁၂ ခုနှစ် ဖေဖော်ဝါရီလအတွင်း ရန်ကုန်တွင်ပြုလုပ်မည့် (၁၁) ကြိမ်မြောက် အရှေ့တောင်အာရှ ကာယဗလ တံခွန်စိုက်ပြိုင်ပွဲ၌ အပြည်ပြည်ဆိုင်ရာ တာဝန်ရှိသူများအား မိတ်ဆက်ပေးသွားမည်ဖြစ်ကြောင်း သိရသည်။ ထပ်မံ၍ သတ်မှတ်ချက်များတွင် ယခင်က ဆံထုံးနေရာ၌ မိမိစိတ်ကြိုက် ထုံးဖွဲ့အလှဆင်နိုင်ပြီး လိုအပ်သော အဆင်တန်ဆာများကို ဝတ်ဆင်ခွင့်ပြုထားကာ ငါးလက်မထက်မမြင့်သော ဒေါက်မြင့်ဖိနပ်စီး၍ ယှဉ်ပြိုင်နိုင်ကြောင်း သိရသည်။
နိုင်ငံတကာ အမျိုးသမီးပြိုင်ပွဲများ၌ ကာယအလှမယ်ပြိုင်ပွဲ သုံးမျိုးရှိသည့်အနက် မြန်မာနိုင်ငံအနေဖြင့် ကာယအလှမယ်ပြိုင်ပွဲ နှစ်မျိုးဖြစ်သည့် Model Physique နှင့် Fitness Physique ပြိုင်ပွဲများ၏ ယှဉ်ပြိုင်ပုံကို အခြေခံပြီး ပြောင်းလဲယှဉ်ပြိုင်သွားမည်ဖြစ်ကြောင်း အဖွဲ့ချုပ်မှ တာဝန်ရှိသူတစ်ဦးကပြောသည်။ “ပြီးခဲ့တဲ့ ပြည်နယ်နဲ့တိုင်း ပြိုင်ပွဲမှာ ပုံစံသစ်နဲ့ သရုပ်ပြပွဲ လုပ်ပြခဲ့ပါတယ်။ ပရိသတ်တွေလည်း လက်ခံအားပေးကြတာ တွေ့ရပါတယ်။ အားကစားကို အားကစားလို မြင်တတ်ဖို့လည်း လိုအပ်ပါတယ်။ တချို့က ကာယအလှမယ်ပြိုင်ပွဲဆိုရင် တခြားအဓိပ္ပာယ် တစ်မျိုးနဲ့ မြင်တတ်ကြတာမျိုးရှိကြတယ်”ဟု အဆိုပါ တာဝန်ရှိသူကပြောသည်။
No comments:
Post a Comment